ស្ថាបនិក៖ លោក ឌិន សុីដែន
លោក ឌិន សុីដែន គឺជាស្ថាបនិកនៃក្រុមហ៊ុន Din & Co. និងជានាយកកម្មវិធីអន្តរជាតិផ្នែកនីតិសាស្ត្រ នៃសាកលវិទ្យាល័យជាតិគ្រប់គ្រង។ បន្ថែមពីលើនេះ លោក គឺជា អ្នកជំនាញការច្បាប់នៃគណៈកម្មាធិការកែទម្រង់ច្បាប់កម្ពុជា និងជាទីប្រឹក្សានៃក្រសួងពាណិជ្ជកម្ម (មានឋានៈស្មើអគ្គនាយក)។ ក្នុងនាមជាអ្នកជំនាញច្បាប់ដែលមានបទពិសោធន៍ខ្ពស់ និងជា ថ្នាក់ដឹកនាំស្ថាប័ន លោកបានដើរតួនាទីយ៉ាងសំខាន់ក្នុងការរៀបចំទិដ្ឋភាពច្បាប់នៅកម្ពុជា ដោយធ្លាប់បានបម្រើការងារជាអគ្គលេខាធិការនៃមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម (ម.ជ.ម) និងជាអគ្គលេខាធិការរង និងជាអ្នកនាំពាក្យនៃគណៈមេធាវីនៃព្រះរាជាណាចក្រកម្ពុជា។
ជំនាញស្នូលរបស់លោក រួមមាន៖
- គោលនយោបាយយុទ្ធសាស្ត្រ និងការផ្តល់ប្រឹក្សាដល់រដ្ឋាភិបាល៖ការផ្តល់យោបល់កម្រិតខ្ពស់ជូនរាជរដ្ឋាភិបាលកម្ពុជា និងការរួមចំណែកដល់គោលនយោបាយច្បាប់ជាតិ រួមមានក្របខ័ណ្ឌយុទ្ធសាស្ត្រនៃកម្មវិធីកែទម្រង់ច្បាប់របស់រាជរដ្ឋាភិបាលកម្ពុជា គោលនយោបាយមេធាវីវ័យក្មេង និងក្របខ័ណ្ឌជំនួយផ្នែកច្បាប់។
- មជ្ឈត្តការ និងការអភិវឌ្ឍស្ថាប័ន៖ក្នុងនាមជាអតីតអគ្គលេខាធិការនៃ ម.ជ.មលោកបានដឹកនាំការព្រាងវិធានស្តីពីមជ្ឈត្តការ និងវិធានស្តីពីសន្ធានកម្ម របស់ ម.ជ.ម និងបានជួយរៀបចំផែនការយុទ្ធសាស្ត្ររយៈពេលបីឆ្នាំរបស់មជ្ឈមណ្ឌល។
- ការអប់រំផ្នែកច្បាប់ និងការរៀបចំកម្មវិធីសិក្សា៖ជាស្ថាបនិក និងជានាយកកម្មវិធី iLaw នៃសាកលវិទ្យាល័យជាតិគ្រប់គ្រង ដែលលោកបាន ផ្តួចផ្តើមការអប់រំផ្នែកច្បាប់ជាភាសាអង់គ្លេសនៅសាកលវិទ្យាល័យជាតិគ្រប់គ្រង និងបានបង្កើតវាឱ្យក្លាយជាកម្មវិធីសិក្សាមួយដែលឈានមុខគេនៅកម្ពុជា។
- ការដោះស្រាយវិវាទ និងការតស៊ូមតិកម្រិតអន្តរជាតិ៖ជាអ្នកជំនាញដែលត្រូវបានទទួល ស្គាល់ក្នុងកម្មវិធីប្រឡងជជែកដេញដោលតាមបែបតុលាការប្រឌិតអន្តរជាតិ ដោយបានផ្តួចផ្តើម និងបង្វឹកក្រុមនិស្សិតជាង ២០ ក្រុម ឱ្យទទួលបានជ័យជម្នះជាប្រវត្តិសាស្ត្រសម្រាប់កម្ពុជា នៅក្នុងការប្រកួតនានានៅទូទាំងអឺរ៉ុប និងអាស៊ី។
លោក ស៊ីដែន បានបញ្ចប់បរិញ្ញាបត្រច្បាប់ (កម្មវិធីជាភាសាអង់គ្លេស) ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ លោកបានបញ្ចប់វគ្គបណ្តុះបណ្តាល ជាមជ្ឈត្តករជាមួយ ម.ជ.ម និងបានបញ្ចប់វគ្គបណ្តុះបណ្តាលជំនាញវិជ្ជាជីវៈមេធាវី នៅមជ្ឈមណ្ឌល បណ្តុះបណ្តាល វិជ្ជាជីវៈមេធាវី នៃគណៈមេធាវី។ ក្នុងនាមជាវាគ្មិនអន្តរជាតិ លោកត្រូវ បានអញ្ជើញជាទៀងទាត់ ដើម្បីពិភាក្សាអំពីការដោះស្រាយវិវាទ និងស្ថានភាព នៃការដោះស្រាយវិវាទ ក្រៅប្រព័ន្ធតុលាការ ក្នុងតំបន់អាស៊ាន រួមទាំងការចូលរួមថ្មីៗនៅប្រទេសម៉ាឡេស៊ី វៀតណាម និងទីក្រុងហុងកុង។
