១. ពិនិត្យ និងបម្រុងទុកឈ្មោះក្រុមហ៊ុន

ជំហានដំបូង គឺត្រូវពិនិត្យថាតើឈ្មោះក្រុមហ៊ុនដែលអ្នកចង់បាន អាចចុះបញ្ជីបានឬអត់។ នៅកម្ពុជា ការចុះបញ្ជីក្រុមហ៊ុនត្រូវបានគ្រប់គ្រងដោយក្រសួងពាណិជ្ជកម្ម ដែលដំណាក់កាលដំបូងគឺត្រូវបម្រុងទុកនាមករណ៍ក្រុមហ៊ុន/សហគ្រាស តាមប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន។

ឈ្មោះដែលបានស្នើសុំអាចប្រឈមនឹងបញ្ហា ប្រសិនបើមានឈ្មោះដូចគ្នា ឬមានភាពស្រដៀងគ្នាដែលអាចបង្កការភ័ន្តច្រឡំជាមួយឈ្មោះក្រុមហ៊ុនដែលបានចុះបញ្ជីរួច។

២. ពិនិត្យភាពអាចប្រើប្រាស់បាននៃម៉ាក

ឈ្មោះក្រុមហ៊ុន និងម៉ាក មិនមែនជារឿងតែមួយនោះទេ។ ក្រុមហ៊ុនអាចចុះបញ្ជីឈ្មោះជាមួយក្រសួងពាណិជ្ជកម្មបាន ខណៈដែលបុគ្គល ឬអាជីវកម្មផ្សេងទៀតអាចមានសិទ្ធិលើម៉ាក ដែលមានឈ្មោះដូចគ្នា ឬស្រដៀងគ្នា។

មុនពេលចំណាយលើការរចនាឡូហ្គោ ការវេចខ្ចប់ ការផ្សព្វផ្សាយ ឬសម្ភារៈម៉ាកយីហោផ្សេងទៀត អ្នកគួរពិនិត្យថាតើឈ្មោះ ឬឡូហ្គោដែលអ្នកចង់ប្រើ ត្រូវបានការពារជាម៉ាករួចហើយឬនៅ។

៣. ពិនិត្យឈ្មោះដែន និងគណនីបណ្តាញសង្គម

នៅក្នុងសេដ្ឋកិច្ចឌីជីថលនាពេលបច្ចុប្បន្ន ការបង្កើតអត្តសញ្ញាណអាជីវកម្មរបស់អ្នក មិនបានបញ្ចប់ត្រឹមការចុះបញ្ជីឈ្មោះក្រុមហ៊ុននោះទេ។ អតិថិជនរបស់អ្នកក៏គួរតែអាចស្វែងរកអាជីវកម្មរបស់អ្នកបានយ៉ាងងាយស្រួលតាមប្រព័ន្ធអនឡាញផងដែរ។

មុនពេលសម្រេចប្រើឈ្មោះណាមួយ អ្នកគួរពិនិត្យថាតើឈ្មោះដែនដែលពាក់ព័ន្ធ និងឈ្មោះគណនីបណ្តាញសង្គមអាចប្រើប្រាស់បានឬអត់។

ប្រសិនបើឈ្មោះដែន ឬឈ្មោះគណនីបណ្តាញសង្គមដែលអ្នកពេញចិត្ត ត្រូវបានប្រើប្រាស់រួចហើយដោយអាជីវកម្មផ្សេងទៀត អ្នកគួរពិចារណាថាតើវាអាចបង្កការភ័ន្តច្រឡំជាមួយអាជីវកម្មរបស់អ្នកឬអត់ មុនពេលសម្រេចប្រើឈ្មោះនោះ។